في ظل الكلام

Loading...

السبت، 7 أبريل، 2012

مؤسسات هالبلد


مؤسسات البلد

مؤسسات البلد يا مؤسسات البلد ,
و أنت لما تحكي مؤسسات البلد لازم تحط ايدك على راسك , مش بالضرورة يكون احترام او " على راسي جزدره مثلا " هو يمكن انت تحط ايدك على راسك من الوجع الي بصيبك من "مؤسسات البلد " ...
ما عجبك موضوع " وجع الراس " و انه مش فاشش غلك ولا واصف الحالة صح !
بلكي بكون سرطان بالدماغ " هيك يمكن احسن .. لا ؟

مؤسسات البلد و المقصود منها هي المؤسسات الي بحبو يأنجلزو اسمها كتير من الاحيان في المحافل الثقافية و الدولية و " الدكنجيه " و بقولو
NGO
هاي المؤسسات العزيزه الي انخلقت لهدف سامي " اكيد " , انه بما انه ما في عنا مؤسسات حكومية تقدر تقوم بواجباتها تجاه احتياجات الوطن و المواطن اجت هاي المؤسسات حتى تاخد بأيد هالمواطن الغلبان و تزبطلو اموره على بين ما يصير عنا مؤسسات حكومية " جدعه " .  سبحانك ربي ما اسرع انتشار هالمؤسسات و تكاثرها .. اشبه بسرطان .
انساك هلا و ركز معي
حبيبات الشعب مؤسسات ال
NGO  , قامت و تقوم بواجبها على اكمل وجه .
مش عاجبك الحكي ؟
بدك نعد سوى؟ ... عد معي لاورجيك ...
1 . استهداف شرائح " حساسة"  بالمجتمع مثل النساء + الاطفال + الشباب . " مشان يشلو عرضهم "
2. خلق حالة ثقافيه مهمه في البلد و تقديم خدمات جمه " غير ربحية " . ثبّت عندك " غير ربحية . يعني الحساب في البنك لازم ينتلي
3. خلق خطوط اتصال و تواصل ما بين البلد و البلاد التانيه " الداعمه " و الي هم بفهمو اكتر بالحياة نسبة لتجربتهم مع الحياة المتحضره
4. خلق واجهات جميلة للتنظيمات السياسية او الدينية . " لانهم فهمو انه ولاد البلد قرفو ربهم من تنظيماتهم ودياناتهم .

و اذا بضل اعد مش رح اخلصلك يا حبيبي للصبح
هاي المؤسسات الي بحب دايما اسميها " دكاكين "  دكان جنبه دكان .. دكاكين مساهمه خاصه محدوده , انت ما الك تسأل من وين و قديش و مين , الي الك خص فيه انه تستحضر روح التطوع " الي انفقدت عند الناس حسب زعم رؤوس هاي المؤسسات " و تسلم كل مواهبك و طاقتك ووقتك للناس الي بعرفو يستثمروها صح .
انت كعنصر قيمتك فقط طول ما انت بتعطي بدون ما تسأل و بدون ما تعترض .
و بالوقت الي بيجي مشروع من خلال " بروبوزال " كتبه واحد من فطاحل هالمؤسسات " ويابيي ما اكثرهم " و انه انجبر اخونا انه تكون مشارك بهالمشروع .. بيجي بقلك وقعلي على 1000 دولار و انت الك منهم 500 , و لما تتجرأ و تسأل بقلك يا رجل المؤسسات في الها
running coast  من وين بدنا نجيبه . بطلع بالاخر مصاريف المؤسسه على حساب حضرة جنابك
و اذا يا مسخم اعترضت , راحت عليك لانه  في الف واحد غبي غيرك " و محتاج للدولار قبل العشره " رح يقبل و راسو مدلدل بالارض .
و منها الي صارت عنده خبره اكبر بالحرمنه و السرقه " ف بيروح موقع عنك على وصل الاستلام بمبلغ " الله اعلم قديش " لانه الاخوان مراعيين مسألة انه وقتك كتير مهم و ما بدهم يغلبوك .

و قد ما بتشتغل و بتحرث و بتقبل على حالك تكون " ثور ساقية " عند اقرب كوع بيبوعوك ولا بسألو عن ابوك , بتجرب تروحلك لمؤسسة ثانية  و كلك امل انها هاي غير " مؤسسة نضيفه و ما فيها ولاد حرام , بصيبك شورت 3 فاز لما بتكتشف انهم قاطعين مسافات طويلة في ابتكار طرق اللف و الدوران و الحرمنه و لعانة الوالدين .

يا مؤسسات يا
NGO  اسمعو و ركزو كتير منيح , اذا كان رح يكون في عنا بهالبلد عدوة الربيع العربي , وشرفكم الرخيص ما رح تكون ثورة على احتلال ولا على سياسة ولا على قلة الدين . رح اول ما تاخد الا دكاكينكم انتو " وبدون استثناء "
بكــــفي ... 

ليست هناك تعليقات:

إرسال تعليق